كتب منصور الرحباني في يوم وفاة نصري :
كانت صوره اليوم تتقدم موكبه الراحل .. فخر الدين ريبال , المختار .. وكان هو يتبعها على بحر من الأكف ..
نصري .. الذي سهرت على صوته أعمدة بعلبك وجذوع الأرز ..
نصري الذي جسد افكارنا نحن الأخوين رحباني . وكان صوتن الهادر ..
يرحل اليوم الى شاطئ الطمأنينة ..
إنه جزء منا يرقد اليوم في تراب جون ..
من زمان كنا ثلاثة … نصري وفيلمون وأنا .. وحين رفعت رأسي اليوم ..
رأيت فيلمون يقف منفردا كشجرة في مهب الريح ..
أسرعت أليه بينما كان ثالثنا نصري يمر بنا لاهيا عنا .. معانقا موته ..
قال فيلمون :
السيبة تقف على ثلاثة أعمدة .. وهاسقط واحد منها … فكيف نثبت نحن ؟
طوقته بذراعي .. واستدنا الى الحائط نبكي بأنتظار سقوطنا …
كلمة الملحّن والشاعر عماد شمس الدين في ذكرى رحيل نصري شمس الدين
شو باك ساكت قول يا مسرح ليش هيك مكوّم وزعلان
عا خشبتك شايف بكي مجرّح شريط أسود طوّق الريحان
تعوّدت شوفك بالفرح مخضّر تعوّدت إسمع صوتك الدافي
ليش وجّك هالحلو مصفّر تعبان وبعزّ الســـهر غـــادي
ليش هيك ملبّك ومبهوت شو اللي مخبّى بقلبك الحسّاس
قلّي خشابي تحوّل التابوت وخبيت فيه قلبي أعزّ الناس ……
مين! نصري مات ! كيف ّ!
معقول عتم الليل يطفي الشمس نصري غفي بجناين الياسمين وراجع لأرضوا جون بسيف وترس فخرالدين .
قوم لاقي حبابك الجايين فخر الدين قوم حاكي قلوب بتحبّك قوم غنّي للدني تلاحين .
اشتاقت لصوتك قلعة بعلبك من يوم ما عرفتك خبيتني بقلبك وبحضن عاطفتك دفيتني بحبك ، كنت بيّ وكنت خيّ وكنت أصدق من صديق .
غبت عنّي وكيف بعدك رح نكمل الطريق قوم يا نصري جايب قصيدة وكم غنّية مؤكد رح ترضيك ما جيت أوفي فضلك عليّ ما جيت تا إرثيك ، قوم با نصري لولادك خود من عمري وخلّيك لبلادك.
يا عاشق تراب الوطن وبكل حبّة في إلك موال إسمك بوجدان الزمن صوتك ربيع بنهدة الشلال عم يندهك لبنان لوين يا غالي ، ما عاد فينا نسمع جديدك ، تتيتّم الألحان وبتحزن ليالي لو بطّلت تسهر , عاتغريدك تسكت حساسين بيدبل الياسمين ورقة ورا ورقة بتخلص الأيام بترحل الأحلام وصوتك بيبقى بالبال باقي يا أعز رفيق بالعيد بالقرميد بالكوخ العتيق بالسنديانة الواقفة بالريح بالسيف باقي خير وتلاويح تاريخك المكتوب عحدود الكلام من بعد منّو بينتهي كلّ الحكي وكفّك الأبيض ساكن بتلج السلام للخير سعيك والمزايا مباركي، يا حبنّا خلّيك مرتاح بضمير ، نصري كنت الأمير بقلوبنا وعطول رح تبقى أمير ….
نصري شمس الدين – نسر الجبل . بقلم شادي قطريب
… قدّام عسكر طايف علّيي ودعسات تهدر والمدافع نار ، وقدّام حاكم بيرقوا مضوّي حولوا جيوش والسيوف كتار بعلُن بصوتي بشوق عينيي بإيدي المشتاقة لمحو العار ، حَيف لعدوّي قول غنيي وحدا لنصري بتلبق الأشعار … بعد ستةٍ وعشرين سنة غياب لم ننساك ، لأنّ رايتك بقيت منصوبة والذهب كان وسيبقى ميزانك ، والله نحنا ملاّ شعب وملاّ عالم وملاّ ناس ، وحياتك يا جرجي البويجي بدك تضل شيخ الشباب اللي طريقوا التلج وبيتوا الضباب بصوتوا الجبلي الأعلى من صنين والأشمخ من الباروك ، يا لطيف يا لطيف بويا بويا بويا .
خبرياتك يا نصري الحارس كانت أشعار خلقت فينا بطولي قطفت من اشيا مجهولي ، فأصبحنا نخاف أن يذهب زمان الحكي ويأتي زمان البكي ، يا سِيد المعنّى والفصاحة بهالساحة العليي وكل ساحة بسيفك اللي مسح الأعدا بحدّو متل ما بتمسح الأرض المساحة ، نحنا رجالك نحنا سيفك لوِّح بسيفك واضرب عكيفك يلّي ببلاد
اللنا غرّبونا وعن لون السما غرّبونا ..
دمّاتك يا شيخ المراجل كانوا خفاف ومن حكياتك ما كنّا نخاف لأنون شعر ودهب غالي ، بيضّووا قناديل الضيعة وبيخلّونا نتنزه بين اللعبي وبين الشعر ، وبيسّهروا عواميد بعلبك وبيزّينوا غصون الأرز ، وبيرّقصوا خصور الشام عزنود لبنان ، وبيدّبكوا حجار تدمر عدراج بيت الدين ، وبتصير الغزلان تسابق غزلان تتبوس شبابيك الحلوي بطرطوس ..
بغيبتك يا راجي بو نعمان يا مرَّجف الأرض ومرّجف الفرسان ورق الذلّ زَهَرَّ على الشجر ، فسرقوا الليل وسرقوا القمر ، حاول الظلم أن يُرّبينا ، لكنهُ نسيَ أننا على إيد المرجّلي قد ربينا بصوتك الجبّار الهدّار الذي كان للخشب منشار ، أماّ أصواتهم فبقيت بأعيُن العالم كلها صغيرة لأنها بكلمة الحقّ والعدل والمحبة فقيرة ..
صرنا متل الحيطان يا بربر يكّلموننا ولا نسمع ، يضربوننا ولا نتحرك ، ومجّمعين على بعضنا متل الحصر العتيقة وأعيننا نحو الأرض ، هل انكتبَ لنا أن ننحبس بسكوتنا بعد أن كثرت تعهداتهم وطالت إلتزاماتهم لنا وبقيت طرقاتنا محفّرة كلها ؟؟ سيوفِّينا الله تعبنا وسيُديم أولاد الحلال إن دبّرنا لهم شي قتلي فولكلوريي أو شي قتلي وطنيي بساحة البلديي لأنَّ البوكس خناق فرنجي وما بيعمل بالبلد طجّي ..
مهما يوسع الظلم وينكسر الحكي ، ويكبر الخوف وينحبس البكي يا زيدون ، بتضّل لإلنا الدار والفيها فيها الكرامي نسقيها وداير مندار نحميها ، بس يا ريت لو كان القانون بحيرة لكنت تلّيتها دموع ، لو كان طحين لكنت خبزتوا للناس ، لو كان قنينة نبيد لكنت شربت وسقيت ، لأنّو الرعيان بوادي بهالليل غفلانين ونحنا القطعان بوادي عبواب الليل سهرانين ..
يا قلبو اللي صرلك من سنين سنين راكض وراهون بس يا مسكين حاجي ورا أهل الهوا تمشي بتتعب ومش رح يتعبوا الحلوين ، دخيلك لا تصدّق يا شيخ الصيّادي بدّون يضلّوا الأهالي ناطرينك تتخلقلون الحكايي لأنو برد الطقس وبدو يجي سمن والتينات عسل وعإمون والعنبات ما في مين يلّمون غيّر العدّان وبدو يجي سمن ، ليتك تُشرِّع جفتك وتنزل كرمال هالولاد اللي ناطرين وبالضحك بيتسلّوا وعالبوابي ناطرين يكبروا ويفلّوا ..
لن ننسى بلاغك الرقم واحد يا بوديب والذي يقول : بدّي بدّي شوف السما حدّي وأشرد عبواب الحراش وما أعرف وين هدّي ، بدّي العالي وطيور العلالي كمّش نسورا والنسر قدّي ، أما بلاغنا الأبدي فيقول لك بيوم الوعد والقول : لا تهملنا لا تنسانا يا شمس المساكين عمنندهلك خلّي يضوّي صوتك علينا ، وبيوم الرجوع نحنا ناطرينك يا رجعة السيف يا رجعة الغار يا سنين الكِبَر يا سنين تنعمّر سوا بلادنا بكل شي ، قمح زرع بيادر معاصر نوال وإيدين تعلا عمّد العين ، نعّمر قصورا جسورا براج وقلاع وبيوت صغيري وبتساع ..
لا ينشغل بالك كثيراً يا مختار إن لم تشهد ريما عليك ، لأنَّ العالم كله سيشهد بأنك كنت أميرَ السيف اللامع وملكَ النصر وسَيِّد الفرسان ، بصوتك الذي لوّح للمجد في الشرق وعلاّه ، فزرعه بأرض الكرامة التي لن تركع ليصبح تاريخ الأبطال وقَدَرْ الفوارس وشرف الأحرار ، فكانَ أقواهم حضوراً وأوسعهم انتشاراً وأكثرهم تميزاً وأعلاهم صوتاً ..
يا ريبال ، أعطتك بلدتك جون زيت وزيتون أما نحن فأعطيناك محبّة القلب وريف العيون ، يا من عطّرتَ برائحة بخورك الربّاني الصاعد من المعبد الرحباني نسيم الريح ونسائم الروح بصفاء الكلمة ، وحفيف الشجر وماء المطر بلطف الأسلوب ، وجمّلت الزهور وأطربت الطيور بعذوبة اللحن ، وبددّت غيوم اليأس والخيبة والحيرة والظلمة ببُعد الخيال ، وبنيت عروش التفاؤل والقوة والعافية والنور بجمال الصورة ، وحوّلت همومنا اليومية إلى أحلامٍ وردية ، تترّطب بالندّي الأزرق وتشرق مع شمس الصباح وتتنشّق أريج الأزهار لتتفتح كزهر اللوز والليمون ..
ليش تاعمتبعدوا عنّا وليش ليش بتهربوا منّا ، ويا نسيم الشوق من عنّا صوبون عجنح الشوق غرّبنا ،،
…… كيف حالهون كيفون حبايبنا ،،،، اشتقنالك يا نصري ……
شادي قطريب – الشارقة
